ஆஸ்திரேலியா அணிக்கெதிரான 5 போட்டிகள் கொண்ட டி20 கிரிக்கெட் தொடரின் இரண்டாவது போட்டியானது இன்று திருவனந்தபுரம் மைதானத்தில் நடைபெற்று வருகிறது. ஏற்கனவே இவ்விரு அணிகளுக்கும் இடையே கடந்த நவம்பர் 23-ஆம் தேதி விசாகப்பட்டினம் மைதானத்தில் நடைபெற்ற முதலாவது டி20 போட்டியில் இரண்டு விக்கெட் வித்தியாசத்தில் ஆஸ்திரேலியா அணியை வீழ்த்திய இந்திய அணியானது இந்த தொடரில் ஒன்றுக்கு பூஜ்யம் (1-0) என்ற கணக்கில் முன்னிலை வகிக்கிறது.
அதனை தொடர்ந்து இரண்டாவது போட்டியானது இன்று திருவனந்தபுரத்தில் நடைபெற்று வருகிறது. இந்த போட்டியில் டாசில் வெற்றி பெற்ற ஆஸ்திரேலிய அணியின் கேப்டன் மேத்யூ வேட் முதலில் தங்களது அணி பந்துவீசும் என்று அறிவித்தார்.
அதனை தொடர்ந்து முதலில் களமிறங்கிய இந்திய அணியானது துவக்கத்தில் இருந்தே அதிரடியாக ரன்களை சேர்த்தது. அதிலும் குறிப்பாக துவக்க வீரர்களான ருதுராஜ் கெய்க்வாட் மற்றும் ஜெய்ஸ்வால் ஆகியோரது சிறப்பான பார்ட்னர்ஷிப் காரணமாக இந்திய அணி ஆஸ்திரேலிய அணிக்கு எதிராக 7 ஆண்டு கால சாதனையை முறியடித்து அசத்தியுள்ளது.
அந்த வகையில் இன்றைய போட்டியின் ஆரம்பத்திலிருந்தே அதிரடியில் வெளுத்து வாங்கிய ஜெய்ஸ்வால் 6-ஆவது ஓவரின் ஐந்தாவது பந்தில் 53 ரன்கள் எடுத்திருந்த நிலையில் ஆட்டம் இழந்தார். இந்த போட்டியில் 25 பந்துகளை சந்தித்த அவர் 9 பவுண்டரி மற்றும் 2 சிக்ஸர்கள் என 53 ரன்கள் குவித்து அசத்தினார்.
அதேவேளையில் ஆறு ஓவர்களின் முடிவில் இந்திய அணி ஒரு விக்கெட்டை மட்டும் இழந்து 77 ரன்கள் குவித்து அசத்தியது. இதன் மூலம் இந்திய அணி படைத்த சாதனை யாதெனில் : ஆஸ்திரேலிய அணிக்கு எதிராக டி20 கிரிக்கெட்டில் பவர்பிளேவின் போது அடிக்கப்பட்ட அதிகபட்ச ஸ்கோராக இன்றைய போட்டியில் இந்த இளம் படைத்த அடித்த 77 ரன்கள் பதிவாகியுள்ளது.
இதையும் படிங்க : 2 ஆவது டி20 போட்டியிலும் தமிழக வீரருக்கு ஏற்பட்ட ஏமாற்றம். டாசுக்கு பின்னர் – சூரியகுமார் யாதவ் எடுத்த முடிவு
இதற்கு முன்னதாக கடந்த 2016-ஆம் ஆண்டு சிட்னி மைதானத்தில் நடைபெற்ற போட்டியில் ஆஸ்திரேலிய அணிக்கு எதிராக இந்திய அணி பவர்பிளேவில் ஒரு விக்கெட் இழந்து 74 ரன்கள் குவித்து இருந்ததே சாதனையாக இருந்த வேளையில் 7 ஆண்டுகால சாதனையை இன்று இந்திய அணி முறியடித்துள்ளது. இந்த போட்டியில் முதலில் விளையாடி முடித்துள்ள இந்திய அணி நிர்ணயிக்கப்பட்ட 20 ஓவர்களின் முடிவில் 4 விக்கெட்டுகளை இழந்து 235 ரன்கள் குவித்து வலுவான நிலையில் உள்ளது குறிப்பிடத்தக்கது.
