ஐசிசி உலகக் கோப்பை 2023 கிரிக்கெட் தொடரை முடித்துக் கொண்டு வங்கதேசம் சென்ற நியூஸிலாந்து அங்கு நடைபெற்ற டெஸ்ட் தொடரை 1 – 1 (2) என்ற கணக்கில் போராடி சமன் செய்தது. அதைத்தொடர்ந்து நியூசிலாந்துக்கு சுற்றுப்பயணம் மேற்கொண்டுள்ள வங்கதேசம் அங்கு 3 போட்டிகள் கொண்ட ஒருநாள் தொடரில் களமிறங்கியுள்ளது. இத்தொடரின் முதல் போட்டி டிசம்பர் 17ஆம் தேதி இந்திய நேரப்படி அதிகாலை 3.30 மணிக்கு டுனிடின் நகரில் நடைபெற்றது.
மழையால் தலா 30 ஓவர்களாக குறைக்கப்பட்ட அந்த போட்டியில் டாஸ் வென்ற வங்கதேசம் முதலில் பந்து வீசுவதாக அறிவித்ததை தொடர்ந்து களமிறங்கிய நியூசிலாந்துக்கு சோரிஃபுல் இஸ்லாம் வீசிய முதல் ஓவரிலேயே ரச்சின் ரவீந்திரா டக் அவுட்டாகி ஏமாற்றத்தை கொடுக்க அடுத்ததாக வந்த ஹென்றி நிக்கோலஸும் டக் அவுட்டாகி பெரிய பின்னடைவை ஏற்படுத்தினார். அதனால் 5/2 என்ற சுமாரான துவக்கத்தை பெற்ற நியூசிலாந்துக்கு மற்றொரு துவக்க வீரர் வில் எங் மற்றும் கேப்டன் டாம் லாதம் ஆகியோர் ஜோடி சேர்ந்து நிதானமாக விளையாடினர்.
அசத்தல் பார்ட்னர்ஷிப்:
அந்த வகையில் 2வது ஓவரில் சேர்ந்த இந்த ஜோடி மிகவும் நிதானமான ஆட்டத்தை வெளிப்படுத்தி சரிவை சரி செய்து ரன் குவிப்பில் ஈடுபட்டது. நேரம் செல்ல செல்ல அதிரடியாக விளையாடிய இந்த ஜோடியில் இருவருமே அரை சதம் கடந்து 26 ஓவர்கள் வரை நங்கூரமாக நின்று 3வது விக்கெட்டுக்கு 171 ரன்கள் பார்ட்னர்ஷிப் அமைத்த போது கேப்டன் டாம் லாதம் 9 பவுண்டரி 3 சிக்சருடன் 92 (77) ரன்களில் ஆட்டமிழந்தார்.
அந்த நிலையில் வந்த மார்க் சேப்மேன் 20 (11) ரன்களில் அவுட்டானாலும் மறுப்புரம் நேர்த்தியான ஆட்டத்தை வெளிப்படுத்திய வில் எங் 14 பவுண்டரி 4 சிக்சருடன் சதமடித்து 105 (84) ரன்கள் குவித்து ஆட்டமிழந்தார். இறுதியில் 30 ஓவரில் நியூசிலாந்து 230/7 ரன்கள் எடுத்த நிலையில் வங்கதேசம் சார்பில் அதிகபட்சமாக சோரிஃபுல் இஸ்லாம் 2 விக்கெட்டுகள் எடுத்தார்.
அதை தொடர்ந்து அதே 30 ஓவர்களில் 245 ரன்கள் தேவை என்ற புதிய இலக்குடன் களமிறங்கிய வங்கதேசம் ஆரம்ப முதலே நியூசிலாந்து பவுலர்களின் தரமான பந்து வீச்சுக்கு தாக்குப் பிடிக்க முடியாமல் தடுமாறியது. அதனால் பெரிய ரன்கள் குவிக்க முடியாமல் தடுமாறி சீரான இடைவெளிகளில் விக்கெட்டுகளை இழந்த வங்கதேசம் 30 ஓவரில் 200/9 ரன்கள் மட்டுமே எடுத்தது தோல்வியை சந்தித்தது.
இதையும் படிங்க: ரோஹித் சர்மாவை டிரேடிங் முறையில் விலைக்கு வாங்க முயன்ற அணி.. பேச்சு வார்த்தை பெயிலியர் – எந்த அணி தெரியுமா?
அந்த அணிக்கு அதிகபட்சமாக அனமுல் ஹைக் 43 (39) தவ்ஹீத் ஹ்ரிஃடாய் 33 (27), அஃபிப் ஹொசைன் 38 (28) ரன்கள் எடுத்த நிலையில் நியூசிலாந்து சார்பில் அதிகபட்சமாக ஆடம் மில்னே, இஸ் சோதி, ஜோஸ் கிளார்க்சன் தலா 2 விக்கெட்டுகளை சாய்த்தனர். அதனால் 44 ரன்கள் வித்தியாசத்தில் வென்ற நியூசிலாந்து 1 – 0* (3) என்ற கணக்கில் ஆரம்பத்திலேயே முன்னிலை பெற்றுள்ளது. மேலும் 171 ரன்கள் பார்ட்னர்ஷிப் அமைத்து வங்கதேசத்தை தோற்கடிக்க முக்கிய காரணமாக இருந்த வில் எங் ஆட்டநாயனாக அறிவிக்கப்பட்டார்.
