ஐபிஎல் 2024 டி20 கிரிக்கெட் தொடரில் ராயல் சேலஞ்சர்ஸ் பெங்களூரு அணி பிளே ஆஃப் சுற்றுக்கு செல்ல போராடி வருகிறது. குறிப்பாக ஆரம்பத்திலேயே 6 போட்டிகளில் தொடர்ச்சியாக தோல்வியை சந்தித்த அந்த அணி புள்ளிப்பட்டியலில் கடைசி இடத்தை வலுவாக பிடித்தது. அதனால் முதல் அணியாக பெங்களூரு லீக் சுற்றுடன் வெளியேறும் என்று எதிர்பார்க்கப்பட்டது.
ஆனால் அதன் பின் கொதித்தெழுந்த அந்த அணி தொடர்ச்சியாக 5 வெற்றிகளை பெற்று இப்போது புள்ளிப்பட்டியலில் 5வது இடத்திற்கு முன்னேறியுள்ளது. இந்த சூழ்நிலையில் மே 18ஆம் தேதி நடைபெறும் நடப்பு சாம்பியன் சென்னைக்கு எதிரான கடைசிப் போட்டியில் பெரிய வெற்றியை பதிவு செய்யும் பட்சத்தில் 4வது அணியாக பெங்களூரு பிளே ஆஃப் செல்வதற்கான வாய்ப்பு உருவாகியுள்ளது.
கைப் கருத்து:
இந்நிலையில் இம்முறையும் பிளே ஆஃப் சென்று பெங்களூரு கோப்பையை வெல்வதற்கான வாய்ப்பு குறைவாக இருப்பதாக முகமது கைஃப் தெரிவித்துள்ளார். இருப்பினும் இந்தளவுக்கு போராடி வந்த அவர்களுக்கு பாராட்டு கொடுக்க வேண்டும் என்றும் அவர் கூறியுள்ளார். அத்துடன் இனிமேலாவது பெங்களூரு நிர்வாகம் கிளன் மேக்ஸ்வெல் போன்ற வெளிநாட்டு வீரர்கள் மீது மோகத்தை காட்டாமல் கொல்கத்தா அணியை போல இந்திய வீரர்களுக்கு வாய்ப்பும் கொடுக்க வேண்டும் என்று அவர் கேட்டுக் கொண்டுள்ளார்.
அதை செய்தால் கண்டிப்பாக அடுத்த வருடம் கோப்பையை வெல்ல முடியும் என்று தெரிவிக்கும் கைஃப் இது பற்றி ஸ்டார் ஸ்போர்ட்ஸ் தொலைக்காட்சியில் பேசியது பின்வருமாறு. “ஆரம்பத்தில் அவர்கள் மோசமாக விளையாடினார்கள். தொடர்ச்சியாக 6 போட்டிகளில் தோல்வியை சந்தித்த அவர்கள் ஒரு மாதம் வெற்றியை பதிவு செய்யவில்லை. அதனாலேயே அவர்கள் இந்தளவுக்கு கீழே சரிந்துள்ளனர்”
“ஆனால் அவர்களின் கம்பேக்கை பாராட்ட வேண்டும். இருப்பினும் அவர்கள் பிளே ஆஃப் செல்வதற்கான வாய்ப்பு மிகவும் குறைவாகவே உள்ளது. எனவே இது ஆர்சிபி அணிக்கு அடுத்த வருடத்திற்கான பாடமாகும். கொல்கத்தா அணி இந்திய வீரர்கள் மீது அதிக முதலீடு செய்த காரணத்தாலேயே புள்ளிப்பட்டியலில் டாப் இடத்தில் உள்ளனர். ராஜஸ்தான் அணியும் அதே போல செயல்படுகிறது. எனவே ஆர்சிபி அணியும் இந்திய வீரர்களுக்கு வாய்ப்பு கொடுத்து ஆதரவை கொடுக்க வேண்டும்”
இதையும் படிங்க: மொத்த நாடும் காத்திருக்கு.. தோனியின் ஹெல்ப் இல்லாம ருதுராஜ் சாதிப்பாரான்னு பாக்கலாம்.. ராயுடு பேட்டி
“அவர்கள் எப்போதும் வெளிநாட்டு வீரர்கள் மீது மோகத்தை கொண்டுள்ளனர். கிளன் மேக்ஸ்வெல் போன்ற நட்சத்திரங்கள் இல்லாமல் நம்மால் வெல்ல முடியும் என்பதை ஆர்சிபி இப்போது உணர்ந்திருப்பார்கள். எனவே இந்திய வீரர்கள் மீது முதலீடு செய்தால் அவர்களால் கோப்பையை வெல்ல முடியும். ராஜஸ்தான் அணியும் அதை செய்துள்ளது. ஜெய்ஸ்வால், சஞ்சு சாம்சன், துருவ் ஜுரேல் போன்றவர்களை அதற்கு எடுத்துக்காட்டாக சொல்லலாம்” என்று கூறினார்.
