வெஸ்ட் இண்டீஸ் கிரிக்கெட் அணிக்கு எதிராக இங்கிலாந்து தங்களுடைய சொந்த மண்ணில் 3 போட்டிகள் கொண்ட டெஸ்ட் தொடரில் விளையாடி வருகிறது. 2025 உலக டெஸ்ட் சாம்பியன்ஷிப் கோப்பையின் அங்கமாக நடைபெறும் இந்தத் தொடரின் முதல் போட்டியில் இங்கிலாந்து இன்னிங்ஸ் வெற்றி பெற்றது. அதைத் தொடர்ந்து நடைபெற்ற இரண்டாவது போட்டியிலும் 241 ரன்கள் வித்தியாசத்தில் இங்கிலாந்து மிரட்டலான வெற்றி பெற்றது.
அந்த போட்டியில் முதலில் பேட்டிங் செய்த இங்கிலாந்து 416 மற்றும் 425 ரன்கள் குவித்தது. மறுபுறம் முதல் இன்னிங்ஸ் 457 ரன்கள் அடித்த வெஸ்ட் இண்டீஸ் முடிந்தளவுக்கு போராடியது. ஆனால் 2வது இன்னிங்ஸில் அந்த அணியை 143 ரன்களுக்கு சுருட்டிய இங்கிலாந்து அதிரடியான வெற்றி பெற்றது. அதனால் 2 – 0* (3) என்ற கணக்கில் ஆரம்பத்திலேயே இத்தொடரை இங்கிலாந்து வென்றுள்ளது.
வாழ்நாள் சாதனை:
இந்த வெற்றிக்கு இங்கிலாந்தின் நம்பிக்கையை நாயகன் ஜோ ரூட் பேட்டிங்கில் 14, 122 ரன்கள் விளாசி முக்கிய பங்காற்றினார். இதையும் சேர்த்து அவர் 142 டெஸ்ட் போட்டிகளில் 11940* ரன்கள் குவித்துள்ளார். அதனால் வெஸ்ட் இண்டீஸ் ஜாம்பவான் சிவ்நரேன் சந்தர்பாலை (11867) முந்தியுள்ள அவர் அதிக டெஸ்ட் ரன்கள் அடித்துள்ள வீரர்களின் பட்டியலில் 8வது இடத்திற்கு முன்னேறியுள்ளார்.
இந்நிலையில் 33 வயது மட்டுமே நிரம்பியுள்ள ஜோ ரூட் டெஸ்ட் கிரிக்கெட்டில் அதிக ரன்கள் குவித்த வீரர் என்ற சச்சின் டெண்டுல்கரின் வாழ்நாள் சாதனையை உடைப்பார் என முன்னாள் இங்கிலாந்து கேப்டன் மைக்கேல் வாகன் நம்பிக்கை தெரிவித்துள்ளார். ஜாம்பவான் சச்சின் 24 வருட டெஸ்ட் கேரியரில் 200 போட்டிகளில் 15921 ரன்களை குவித்து உலக சாதனை படைத்துள்ளார். அதை ரூட் முறியடிப்பார் என்று தெரிவிக்கும் அவர் இது பற்றி டெலிகிராஃப் இணையத்தில் கூறியது பின்வருமாறு.
“இன்னும் சில மாதங்களில் இங்கிலாந்துக்காக டெஸ்ட் கிரிக்கெட்டில் அதிக ரன்கள் அடித்த வீரராக ஜோ ரூட் சாதனை படைப்பார். அப்படியே சச்சின் டெண்டுல்கரையும் அவர் முந்தப்போவது ஸ்பெஷலாக இருக்கும். பேட்டிங்கில் தற்போதைய இங்கிலாந்து அணி கடந்த காலத்தை போல் பொறுப்பற்றவர்களாக தெரியவில்லை. அவர்கள் விரைவாக ஸ்கோர் செய்கின்றனர்”
இதையும் படிங்க: விராட் கோலிக்கு மெசேஜ் பண்ணிட்டேன்.. எதிரியா இருந்த நாங்க இந்தியாவுக்காக இதை செய்வோம்.. கம்பீர் வெளிப்படை
“அவர்கள் ஈகோவை எடுத்துக் கொள்வதாகவும் தெரியவில்லை. அவர்கள் நன்றாக விளையாடுகின்றனர். அதற்கு ரூட் பாறையைப் போல் நின்று பேட்டிங்கில் முக்கிய பங்காற்றுகிறார். 100 ரன்கள் கடந்து இங்கிலாந்து முன்னிலையில் இருக்கும் வரை அவர் தொடர்ந்து ரிவர்ஸ் ஸ்கூப் அடிப்பதை நான் விரும்புவேன்” என்று கூறினார்.
