உலக டெஸ்ட் சாம்பியன்ஷிப் கோப்பையின் முதல் (2019 – 2021) தொடரில் விராட் கோலி தலைமையில் சிறப்பாக விளையாடி ஃபைனலில் நியூசிலாந்திடம் தோற்ற இந்தியா 2வது தொடரில் (2021 – 2023) ரோகித் சர்மா தலைமையில் நன்றாக விளையாடியும் இறுதிப்போட்டியில் ஆஸ்திரேலியாவிடம் வீழ்ந்தது. இதை தொடர்ந்து 2025 டெஸ்ட் சாம்பியன்ஷிப் கோப்பையின் ஃபைனலுக்கு தகுதி பெறும் பயணத்தில் முதலாவதாக வலுவான தென்னாப்பிரிக்காவை அதனுடைய சொந்த மண்ணில் 2 போட்டிகள் கொண்ட டெஸ்ட் தொடரில் இந்தியா எதிர்கொள்கிறது.
அதை தொடர்ந்து தங்களுடைய சொந்த மண்ணில் வரும் ஜனவரி மாதம் வலுவான இங்கிலாந்துக்கு எதிராக 5 போட்டிகள் கொண்ட மெகா டெஸ்ட் தொடரில் இந்தியா விளையாட உள்ளது. கடைசியாக கடந்த 2012இல் இங்கிலாந்திடம் தோல்வியை சந்தித்த இந்தியா அதன் பின் கடந்த 11 வருடங்களாக சொந்த மண்ணில் உலகில் எந்த அணிக்கு எதிராகவும் ஒரு டெஸ்ட் தொடரில் கூட தோற்காமல் இருந்து வருகிறது.
இங்கிலாந்து அணி அறிவிப்பு:
எனவே இம்முறையும் இந்தியா வெல்வதற்கு வாய்ப்பு அதிகமாக இருந்தாலும் அதற்கு இங்கிலாந்து மிகப்பெரிய சவாலை கொடுக்கும் என்று எதிர்பார்க்கப்படுகிறது. ஏனெனில் பென் ஸ்டோக்ஸ் – ப்ரெண்டன் மெக்கல்லம் புதிய கேப்டன் மற்றும் பயிற்சியாளராக பொறுப்பேற்றது முதல் டெஸ்ட் கிரிக்கெட்டில் டி20 என்ற அதிரடி ஆட்டத்தை வெளிப்படுத்தி வரும் இங்கிலாந்து தொடர்ச்சியாக வெற்றிகளை பெற்று வருகிறது.
அந்த வரிசையில் வலுவான இந்தியாவை அதனுடைய சொந்த மண்ணில் தோற்கடிப்போம் என்று சமீபத்தில் பென் ஸ்டோக்ஸ் – ப்ரெண்டன் மெக்கல்லம் உறுதியான நம்பிக்கை தெரிவித்திருந்தனர். அந்த சூழ்நிலையில் இந்தியாவுக்கு எதிராக களமிறங்கும் தங்களுடைய 16 பேர் கொண்ட அணியை இங்கிலாந்து வாரியம் அறிவித்துள்ளது.
பொதுவாக இந்தியாவில் சுழலுக்கு சாதகமான மைதானங்கள் இருக்கும் என்பதால் அதில் அசத்துவதற்காக ஜேக் லீச், ரெஹன் அஹ்மத், சோயப் பசீர், டாம் ஹார்ட்லி ஆகிய 4 ஸ்பெஷலிஸ்ட் ஸ்பின்னர்களை இங்கிலாந்து தேர்வு செய்துள்ளது. மேலும் இந்த அணியில் 41 வயதாகும் ஜாம்பவான் ஜேம்ஸ் ஆண்டர்சன் மீண்டும் தேர்வாகி வியப்பை ஏற்படுத்தியுள்ள நிலையில் மார்க் வுட், கஸ் அட்கின்சன், ஓலி ராபின்சன் ஆகியோர் வேகப்பந்து வீச்சாளர்களாக தேர்வாகியுள்ளனர்.
இதையும் படிங்க: அடுத்த 10 வருஷத்துக்கு பாபர் அசாமை ஒன்னுமே பண்ண முடியாது. ஏன் தெரியுமா? – பாராட்டிய கவுதம் கம்பீர்
மற்ற படி காயத்துக்கான அறுவை சிகிச்சை முடித்துக் கொண்டு இத்தொடரில் கேப்டனாக செயல்படும் பென் ஸ்டோக்ஸ் தலைமையில் அதிரடியாக விளையாடக்கூடிய ப்ரூக், க்ராவ்லி, பேர்ஸ்டோ போன்ற நட்சத்திர வீரர்களும் இடம் பெற்றுள்ளனர். 2024 இந்திய டெஸ்ட் தொடருக்கான இங்கிலாந்து அணி: பென் ஸ்டோக்ஸ் (கேப்டன்), பென் டூக்கெட், ஜாக் கிராவ்லி, ஜோ ரூட், ஓலி போப், ஹரி ப்ரூக், ஜானி பேரஸ்ட்டோ (கீப்பர்), பென் போக்ஸ் (கீப்பர்), ஓலி ராபின்சன், டாம் ஹார்ட்லி, மார்க் வுட் ரெஹன் அகமத், சோயாப் பஷீர், கஸ் அட்கின்சன், ஜேம்ஸ் ஆண்டர்சன், ஜாக் லீச்
