மும்பை வான்கடே மைதானத்தில் நேற்று இரவு கோலாகலமாக துவங்கி நடைபெற்ற 15-வது ஐபிஎல் தொடரின் முதல் போட்டியில் நடப்பு சாம்பியனான சிஎஸ்கே அணியை கொல்கத்தா அணி 6 விக்கெட் வித்தியாசத்தில் வீழ்த்தி அபார வெற்றி பெற்றது. அதோடு இந்த தொடரில் கொல்கத்தா அணி தங்களது முதல் வெற்றியை பலம் வாய்ந்த சென்னை அணிக்கு எதிராக பெற்று சிறப்பான துவக்கத்தை பெற்றுள்ளது.
இந்த போட்டியில் டாசில் வெற்றி பெற்ற கொல்கத்தா அணியின் கேப்டன் ஷ்ரேயாஸ் ஐயர் முதலில் பந்துவீச்சை தேர்வு செய்தார். அதன்படி முதலில் விளையாடிய சென்னை அணி நிர்ணயிக்கப்பட்ட 20 ஓவர்களில் 131 ரன்களை மட்டுமே குவிக்க அடுத்ததாக விளையாடிய கொல்கத்தா அணி 18.3 ஓவர்களில் எளிதாக அந்த ரன்களை சேஸிங் செய்து வெற்றி பெற்றது.
இப்படி சிறிய இலக்கினை கொல்கத்தா எளிதில் சேசிங் செய்தாலும் சென்னை அணி கடைசி வரை தங்களது நம்பிக்கையை கைவிடாமல் போராடினர் என்றே கூறலாம். அதிலும் குறிப்பாக சென்னை அணியின் அனுபவ முன்னணி வீரரான பிராவோ நேற்றைய போட்டியில் தனது சிறப்பான பந்துவீச்சை வெளிப்படுத்தி இருந்தார்.
நேற்றைய போட்டியில் 4 ஓவர்கள் வீசிய அவர் 20 ரன்கள் மட்டுமே விட்டுக்கொடுத்து 3 முக்கிய விக்கெட்டுகளை கைப்பற்றினார். இப்படி நேற்றைய போட்டியில் சிறப்பாக பந்து வீசிய பிராவோ ஐபிஎல் வரலாற்றில் லசித் மலிங்காவின் மிகப்பெரிய சாதனை ஒன்றினை சமன் செய்துள்ளார்.
அதன்படி ஐபிஎல் கிரிக்கெட்டில் 122 போட்டிகளில் விளையாடியுள்ள மலிங்கா 170 விக்கெட்டுகள் வீழ்த்தி ஐபிஎல் கிரிக்கெட்டில் அதிக விக்கெட்டுகளை வீழ்த்திய பந்துவீச்சாளர் என்ற பட்டியலில் முதலிடத்தில் இருந்தார். அதனை நேற்றைய கொல்கத்தா அணிக்கெதிரான போட்டியில் பிராவோ சமன் செய்து அசத்தினார்.
இதையும் படிங்க : தோனி எப்போ பேட்டிங் பண்ணாலும் எனக்கு அந்த பயம் இருக்குங்க – வெற்றிக்கு பிறகு பேசிய ஷ்ரேயாஸ் ஐயர்
இதுவரை 151 ஐ.பி.எல் போட்டிகளில் விளையாடியுள்ள அவர் 170 விக்கெட்டுகளை வீழ்த்தி பிராவோவை சமன் செய்துள்ளார். ஐபிஎல் வரலாற்றின் ஆரம்ப காலத்திலிருந்தே விளையாடி வரும் பிராவோ துவக்கத்தில் சில சீசன்கள் மும்பை அணிக்காக விளையாடினாலும் அதற்கடுத்து தொடர்ந்து சிஎஸ்கே அணிக்காக மட்டுமே விளையாடி வருகிறார் என்பது குறிப்பிடத்தக்கது.
