ஐ.பி.எல் தொடரின் 54 ஆவது போட்டி சின்னசாமி மைதானத்தில் பெங்களூருவில் நேற்று இரவு 8 மணிக்கு நடந்தது. இந்த போட்டியில் கோலி தலைமையிலான பெங்களூரு அணியும், வில்லியம்சன் தலைமையிலான சன் ரைசர்ஸ் அணியும் மோதின.
இந்த போட்டியில் டாஸ் வென்று முதலில் பந்துவீச்சினை தேர்வு செய்தது பெங்களூரு அணி. அதன்படி முதலில் விளையாடிய சன் ரைசர்ஸ் அணி 20 ஓவர்கள் முடிவில் 7 விக்கெட் இழப்பிற்கு 175 ரன்களை குவித்தது. அதிகபட்சமாக வில்லியம்சன் ஆட்டமிழக்காமல் 43 பந்துகளில் 70 ரன்களை குவித்தார்.
இதனால் 176 ரன்கள் என்ற வெற்றி என்ற இலக்குடன் பின்னர் ஆடிய பெங்களூரு அணி 19.2 ஓவர்களில் 6 விக்கெட் இழப்பிற்கு 178 ரன்களை அடித்து 4 விக்கெட் வித்தியாசத்தில் வெற்றி பெற்றது. அதிகபட்சமாக ஹெட்மயர் 75 ரன்களும், குர்கிரத் சிங் 65 ரன்களையும் குவித்தனர். ஹெட்மயர் ஆட்டநாயகன் விருதினை பெற்றார்.
போட்டி முடிந்து தோல்வி குறித்து பேசிய வில்லியம்சன் கூறியதாவது : நாங்கள் ஆட்டத்தின் பாதியிலேயே எங்களது வெற்றி எங்களின் கட்டுப்பாட்டில் இருக்கிறது என்று நினைத்தோம். ஆனால், பெங்களூரு அணி வீரர்கள் வெற்றியை எங்களிடம் இருந்து பறித்து எங்களின் எண்ணத்தை பொய்யாக்கினார்கள்.
மேலும், 10-15 ரன்கள் குறைவாக அடித்துவிட்டோம். கடந்த இரு போட்டிகளாக தோல்விகளை சந்தித்து விட்டோம். தற்போது தோல்வியை நினைத்து வருந்துவதைவிட அடுத்த போட்டியை நினைத்து இந்த தோல்வியை மறக்க வேண்டும் என்று வில்லியம்சன் கூறினார்.
