இந்தியா மற்றும் நியூசிலாந்து அணிகளுக்கு இடையேயான மூன்று போட்டிகள் கொண்ட ஒருநாள் கிரிக்கெட் தொடரானது தற்போது இந்தியாவில் விறுவிறுப்பாக நடைபெற்று வருகிறது. இந்த தொடரின் முதலாவது போட்டி ஏற்கனவே வடோதரா நகரில் ஜனவரி 11-ஆம் தேதி நடைபெற்று முடிந்த வேளையில் அந்த போட்டியில் வெற்றி பெற்ற இந்திய அணியானது இந்த தொடரில் ஒன்றுக்கு பூஜ்யம் (1-0) என்ற கணக்கில் முன்னிலை வகிக்கிறது.
2 ஆவது போட்டியில் விராட் கோலி நிகழ்த்த காத்திருக்கும் சாதனை :
அதனை தொடர்ந்து இவ்விரு அணிகளுக்கும் இடையேயான இரண்டாவது ஒருநாள் போட்டியானது ஜனவரி 14-ஆம் தேதி ராஜ்கோட் நகரில் நடைபெற இருக்கிறது. இந்நிலையில் இந்த இரண்டாவது ஒருநாள் போட்டியில் விளையாட இருக்கும் இந்திய அணியின் நட்சத்திர வீரரான விராட் கோலி மாபெரும் சாதனை ஒன்றினை ஒருநாள் போட்டிகளில் நிகழ்த்த காத்திருக்கிறார்.
அது குறித்த தகவல் வெளியாகி தற்போது அனைவரது மத்தியிலும் கவனத்தை ஈர்த்துள்ளது. அந்த வகையில் விராட் கோலி நிகழ்த்தப்போகும் சாதனை யாதெனில் : இதுவரை தான் கடைசியாக விளையாடிய ஐந்து போட்டிகளிலும் 50+ ஸ்கோரை அடித்துள்ள விராட் கோலி இரண்டாவது போட்டியில் மேலும் ஒரு அரைசதத்தை அடித்தால் 6 போட்டிகளில் தொடர்ச்சியாக 50+ ரன்களை குவித்த முதல் இந்திய வீரர் என்ற சாதனையை நிகழ்த்துவார்.
ஏற்கனவே இந்திய அணி சார்பாக சச்சின் டெண்டுல்கர், ராகுல் டிராவிட், ரோகித் சர்மா மற்றும் அஜின்க்யா ரகானே ஆகியோர் 5 ஒருநாள் போட்டிகளில் தொடர்ச்சியாக 50+ ரன்களை அடித்திருந்த வேளையில் விராட் கோலி தற்போது அதே நிலையுடன் சமநிலையில் உள்ளார்.
உலகளவில் தொடர்ச்சியாக அதிக 50+ ஸ்கோரை அடித்த வீரர்களின் பட்டியலில் ஜாவித் மியான்தத் 9 முறை 50+ ஸ்கோருடன் முதலிடத்திலும், இன்சமாம் உல் ஹக் 7 முறை 50+ ஸ்கோருடன் இரண்டாவது இடத்திலும் உள்ளனர். ஒருவேளை அடுத்த போட்டியில் விராட் கோலி ஆறாவது முறையாக 50+ ஸ்கோரை அடிக்கும் பட்சத்தில் இந்த பட்டியலில் மூன்றாவது இடத்தை பிடிப்பார் என்பது குறிப்பிடத்தக்கது.
இதையும் படிங்க : இந்த வயசுலயும் விராட் கோலி இப்படி அடிச்சு நொறுக்க இதுவே காரணம் – ரவிச்சந்திரன் அஷ்வின் கருத்து
விராட் கோலி கடைசியாக விளையாடிய 5 போட்டிகளில் 156 சராசரியுடன் 469 ரன்களை குவித்துள்ளார். இதில் இரண்டு சதம் மற்றும் மூன்று அரைசதம் அடங்கும்.
