இந்தியா மற்றும் தென் ஆப்பிரிக்கா அணிகளுக்கு இடையே நடைபெற்று வரும் முதலாவது டெஸ்ட் போட்டியில் இந்திய அணியை சேர்ந்த முன்னணி வேகப்பந்து வீச்சாளரான முகமது ஷமி டெஸ்ட் கிரிக்கெட் வரலாற்றில் முதல் இந்திய பவுலராக மிகப்பெரிய சாதனை ஒன்றை படைத்து வரலாற்றில் இடம் பிடித்துள்ளார். அதன்படி இந்த போட்டிக்கு முன்னர் வரை ஷமி 54 டெஸ்ட் போட்டிகளில் விளையாடி இருந்த அவர் 195 விக்கெட்டுகளை வீழ்த்தி இருந்தார். இந்நிலையில் இந்த போட்டியின் முதலாவது இன்னிங்சில் மேலும் 5 விக்கெட்டுகளை கைப்பற்றியதன் மூலம் 200 விக்கெட்டுகளை கைப்பற்றி சாதனைப் படைத்துள்ளார்.
இதன் மூலம் டெஸ்ட் கிரிக்கெட்டில் 200 விக்கெட்டுகளை கைப்பற்றிய 11-ஆவது இந்திய பந்துவீச்சாளராக அவர் இணைந்துள்ளார். அதுமட்டுமின்றி வேகப்பந்து வீச்சாளராக 200 விக்கெட்டுகளைக் கைப்பற்றிய ஐந்தாவது இந்திய பவுலர் என்ற பெருமையையும் அவர் இந்த போட்டியின் மூலம் பெற்றுள்ளார்.
இந்த சாதனையில் ஒரு சிறப்பான சம்பவம் யாதெனில் இந்திய பவுலர்களில் முதல் வீரராக குறைந்த பந்துகளில் 200 விக்கெட்டுகளை கைப்பற்றி அசத்தியுள்ளார். இந்த 200 விக்கெட்டுக்களை எடுக்க ஷமி 9896 பந்துகளை மட்டுமே எடுத்துக் கொண்டார். இவருக்கு முன்னதாக அஷ்வின் 10248 பந்துகளில் 200 விக்கெட்டுகளை கைப்பற்றி இருந்தார்.
அதேபோன்று 200 விக்கெட்டுகளை கைப்பற்ற கபில்தேவ் 11066 பந்துகளையும், ஜடேஜா 11989 பந்துகளையும் எடுத்துக்கொண்டனர். இதன்மூலம் இவர்கள் அனைவரையும் கடந்து குறைந்த பந்துகளில் 200 விக்கெட்டுகளைக் கைப்பற்றிய முதல் இந்திய பவுலர் என்ற பெருமையையும் அவர் பெற்றார் என்பது குறிப்பிடத்தக்கது.
இதையும் படிங்க : போட்டிக்கு முன்னரே தெ.ஆ வீரருக்கு உறுதியான கொரோனா தொற்று – மறைத்து நாடகமாடியதா தென்னாப்பிரிக்கா
இதுவரை இந்திய அணிக்காக 55 டெஸ்ட் போட்டிகளில் விளையாடியுள்ள முகமது ஷமி 200 விக்கெட்டுகளை கைப்பற்றியுள்ளது குறிப்பிடத்தக்கது. இந்த முதலாவது டெஸ்ட் போட்டியின் மூன்றாம் நாள் ஆட்டநேர முடிவில் இந்திய அணி 146 ரன்கள் முன்னிலை பெற்றுள்ளதால் இந்திய அணி இந்த போட்டியில் வெற்றி பெறவும் வாய்ப்புள்ளது.
