இந்திய அணி தற்போது வங்கதேச அணிக்கு எதிரான முதல் டெஸ்ட் போட்டியில் அபாரமாக விளையாடி வெற்றியை கைப்பற்றியது. இந்நிலையில் தற்போது சர்வதேச கிரிக்கெட் கவுன்சிலான ஐசிசி நேற்று டெஸ்ட் போட்டிக்கான வீரர்களின் தரவரிசை பட்டியலை வெளியிட்டது.
அதன்படி நேற்று வெளியிடப்பட்ட டெஸ்ட் போட்டிக்கான வீரர்கள் தரவரிசையில் இந்திய அணி வீரர்கள் கணிசமாக முன்னேற்றத்தை கண்டுள்ளனர். வங்கதேச அணிக்கு எதிரான முதலாவது டெஸ்ட் போட்டியில் இரண்டு இன்னிங்சிலும் சேர்த்து 7 விக்கெட்டுகளை கைப்பற்றிய ஷமி தர வரிசையில் தற்போது எட்டு இடங்கள் முன்னேறி தன் வாழ்நாளில் சிறந்த இடமான 7 ஆவது இடத்திற்கு முன்னேறியுள்ளார்.
மேலும் கபில்தேவ்(877), பும்ரா(832) ஆகியோருக்குப் பின் அதிக புள்ளிகளைப் பெற்ற இந்திய வீரர் என்ற சாதனையை அவர் படைத்தார். ஷமி தற்போது 790 புள்ளிகளுடன் பந்துவீச்சாளர்கள் பட்டியலில் 7 ஆவது இடத்தில் உள்ளார்.
அதேபோல இரட்டை சதமடித்து அசத்திய அகர்வால் டெஸ்ட் போட்டிகளில் 691 புள்ளிகளை சேர்த்து டெஸ்ட் பேட்ஸ்மேன் தரவரிசையில் 11-வது இடத்தில் உள்ளார். இந்திய வீரர்களான கோலி, ரஹானே, புஜாரா மற்றும் புரோகித் ஆகியோர் முதல் 10 இடத்தில் உள்ளதால் நான்கு இந்திய வீரர்கள் டெஸ்ட் தரவரிசையில் முதல் 10 இடத்திற்குள் இருப்பது குறிப்பிடத்தக்கது.
