ஆஸ்திரேலியா அணிக்கு எதிராக அண்மையில் இந்தியாவில் நடைபெற்று முடிந்த மூன்று போட்டிகள் கொண்ட ஒருநாள் கிரிக்கெட் தொடரில் இந்திய அணி சிறப்பான ஆட்டத்தை வெளிப்படுத்தி இரண்டுக்கு ஒன்று (2-1) என்ற கணக்கில் கோப்பையை கைப்பற்றி அசத்தியது. அதனை தொடர்ந்து தற்போது உலக கோப்பை தொடருக்கான பயிற்சி போட்டிகளில் பங்கேற்று விளையாட இருக்கிறது.
இந்நிலையில் ஆஸ்திரேலிய அணிக்கு எதிரான முதல் இரண்டு போட்டியில் ஓய்வில் இருந்த ரோகித் சர்மா மூன்றாவது போட்டியின் போது மீண்டும் அணிக்கு திரும்பி சிறப்பான ஆட்டத்தை வெளிப்படுத்தியிருந்தார். அதிலும் குறிப்பாக ஆஸ்திரேலிய அணிக்கு எதிராக நடைபெற்று முடிந்த அந்த மூன்றாவது ஒருநாள் போட்டியில் 353 ரன்கள் அடித்தால் வெற்றி என்று இலக்கினை எதிர்த்து விளையாடும்போது அசத்தலான ஆட்டத்தை வெளிப்படுத்தினார்.
அதன்படி 57 பந்துகளை சந்தித்து ஐந்து பவுண்டரி மற்றும் 6 சிக்ஸர்கள் என 81 ரன்கள் குவித்து அசத்தினார். அவர் அடித்த இந்த ஆறு சிக்ஸர்கள் மூலம் சர்வதேச கிரிக்கெட்டில் 551 சிக்ஸர்களை பறக்கவிட்டு கிரிஸ் கெயில் (553) அடுத்து அதிக சிக்ஸர்களை விளாசிய வீரர் என்ற வரலாற்று சாதனையையும் நிகழ்த்தி இருந்தார்.
இப்படி சிக்ஸர்களை எளிதாக அடித்து விளாசும் ரோகித் சர்மா தற்போது youtube சேனல் ஒன்றுக்கு அளித்துள்ள பேட்டியில் : சிக்ஸர்கள் குறித்த விதிமுறை மாற்றப்பட வேண்டும் என்று கூறியுள்ளது அனைவரது மத்தியிலும் கவனத்தை ஈர்த்துள்ளது. அந்த வகையில் விமல் குமார் என்பவருடன் நடைபெற்ற யூடியூப் பேட்டியில் பேசிய ரோஹித் சர்மா பல்வேறு கேள்விகளுக்கு பதில் அளித்தார்.
அதில் விமல் குமார் எழுப்பிய கேள்வி ஒன்றில் சர்வதேச கிரிக்கெட்டில் நீங்கள் என்ன விதிமுறையில் மாற்ற கொண்டுவர வேண்டும்? என்ற கேள்வியை எழுப்பினார். அதற்கு பதிலளித்த ரோகித் சர்மா கூறுகையில் : ஒரு வீரர் 90 மீட்டருக்கு மேல் சிக்ஸ் அடித்தால் 8 ரன்களை வழங்க வேண்டும். அதேபோன்று 100 மீட்டருக்கு மேல் சிக்சர் அடித்தால் 10 ரன்களை வழங்க வேண்டும்.
இதையும் படிங்க : ஐசிசி உலக கோப்பை 2023 : அப்செட் செய்வதை தாண்டி ஏதேனும் சாதிக்கும் தரம் இருக்கா.. வங்கதேச அணியின் முழுமையான அலசல்
இதுதான் கிரிக்கெட் விதிமுறைகளில் செய்ய வேண்டிய மாற்றம் என்று நினைக்கிறேன். ஏனெனில் அதிக தூரம் அடிக்கும் பேட்ஸ்மன்களுக்கு இது நியாயமானதாக இருப்பதாக எனக்கு தெரியவில்லை. பிரமாண்டமான சிக்ஸர்களுக்கு 6 ரன் மட்டுமே வழங்குவது நியாயமற்ற செயல் என அவர் கூறியது குறிப்பிடத்தக்கது.
