ஆப்கானிஸ்தானுக்கு எதிராக தங்களுடைய சொந்த மண்ணில் விளையாடி வரும் 3 போட்டிகள் கொண்ட டி20 கிரிக்கெட் தொடரின் முதல் இரண்டு போட்டிகளில் இந்தியா அடுத்தடுத்த வெற்றிகளை பெற்றுள்ளது. அதனால் 2 – 0* என்ற கணக்கில் ஆரம்பத்திலேயே கோப்பையை கைப்பற்றியுள்ள இந்தியா நம்பர் ஒன் அணி என்பதற்கு அடையாளமாக செயல்பட்டு 2024 டி20 உலகக் கோப்பைக்கு தயாராகும் பயணத்தில் வெற்றி நடை போட்டு வருகிறது.
இந்தூரில் ஜனவரி 14ஆம் தேதி நடைபெற்ற இத்தொடரின் 2வது போட்டியில் முதலில் பேட்டிங் செய்த ஆப்கானிஸ்தான் 173 ரன்கள் மட்டுமே இலக்காக நிர்ணயித்தது. அந்த அணிக்கு அதிகபட்சமாக குல்பதின் நைப் 57 ரன்கள் எடுக்க இந்தியா சார்பில் அதிகபட்சமாக அர்ஷிதீப் சிங் 3 விக்கெட்டுகள் எடுத்தார். அதை சேசிங் செய்த இந்தியாவுக்கு ஜெய்ஸ்வால் அதிரடியாக 68 சிவம் துபே 63* ரன்கள் குவித்து எளிதான வெற்றியை பெற்றுக் கொடுத்தனர்.
ரோஹித்தின் சாதனை:
முன்னதாக இந்த போட்டியில் களமிறங்கிய இந்திய கேப்டன் ரோகித் சர்மா சர்வதேச டி20 கிரிக்கெட்டில் 150 போட்டிகளில் விளையாடிய முதல் வீரர் என்ற மாபெரும் உலக சாதனை படைத்தார். இருப்பினும் அதில் டக் அவுட்டான அவர் ரசிகர்களுக்கு ஏமாற்றத்தை கொடுத்த போதிலும் கேப்டனாக அணியை சிறப்பாக வழி நடத்தி வெற்றியில் தன்னுடைய பங்காற்றினார்.
அந்த வகையில் இந்த வெற்றியையும் சேர்த்து ரோஹித் சர்மா கேப்டனாக இதுவரை 41 வெற்றிகளை பெற்றுள்ளார். அதன் வாயிலாக சர்வதேச டி20 கிரிக்கெட்டில் அதிக வெற்றிகளை பதிவு செய்த இந்திய கேப்டன் என்ற எம்எஸ் தோனியின் வாழ்நாள் சாதனையை ரோஹித் சர்மா சமன் செய்துள்ளார். இதற்கு முன் 72 போட்டிகளில் தோனி 41 வெற்றிகளை பெற்றிருந்த நிலையில் தற்போது ரோகித் சர்மா 53 போட்டிகளிலேயே 41* வெற்றிகளை பதிவு செய்து அந்த சாதனையை சமன் செய்துள்ளார்.
இது மட்டுமல்லாமல் இந்த தொடரையும் சேர்த்து இதுவரை ரோகித் சர்மா 12 தொடர்களில் கேப்டனாக வெற்றியை பதிவு செய்துள்ளார். இதன் வாயிலாக சர்வதேச டி20 கிரிக்கெட்டில் அதிக தொடர்களை வென்ற கேப்டன் என்ற புதிய சாதனையும் அவர் படைத்துள்ளார். அந்த வகையில் இத்தொடரில் கேப்டனாக சாதனைகளை படைத்துள்ள ரோகித் சர்மா 2024 டி20 உலகக். கோப்பையிலும் இந்தியாவை வழி நடத்துவார் என்று ரசிகர்கள் எதிர்பார்க்கின்றனர்.
இதையும் படிங்க: நான் அவர ஃபாலோ பண்ணி அடிக்கிறேன்.. என்னோட கம்பேக்கிற்கு அவங்கள பாராட்டுங்க.. துபே பேட்டி
இருப்பினும் கேப்டனாக அசத்தும் அவர் டி20 கிரிக்கெட்டில் பேட்ஸ்மேனாக தடுமாற்றமாகவே செயல்பட்டு வருகிறார். எனவே அடுத்து வரும் ஐபிஎல் தொடரில் மும்பை அணியில் சாதாரண வீரராக விளையாட உள்ள அவர் அந்த வாய்ப்பில் அதிரடியாக பெரிய ரன்கள் குவித்தால் கண்டிப்பாக உலகக் கோப்பையில் கேப்டனாக செயல்படுவார் என்று நம்பலாம்.
