ஸ்பின்னர்களை அடித்து நொறுக்க அவர் கொடுத்த அட்வைஸ் தான் காரணம்.. ரிஷப் பண்ட் ஓப்பன்டாக்

இந்திய கிரிக்கெட் வீரர் ரிஷப் பண்ட் டெஸ்ட் கிரிக்கெட்டில் சிறந்த விக்கெட் கீப்பர் பேட்ஸ்மேனாக செயல்பட்டு வருகிறார். கடந்த 2017 முதல் இந்திய அணிக்காக விளையாடும் அவர் ஒருநாள் மற்றும் டி20 கிரிக்கெட்டில் இதுவரை தொடர்ச்சியாக அசத்தியதில்லை. இருப்பினும் டெஸ்ட் கிரிக்கெட்டில் தோனியையே மிஞ்சியுள்ள அவர் இங்கிலாந்து, தென்னாப்பிரிக்காவில் சதமடித்த முதல் ஆசிய விக்கெட் கீப்பராக சாதனை படைத்துள்ளார்.

மேலும் 2021 காபா போட்டியில் வெற்றி பெறுவதற்கு முக்கிய பங்காற்றிய அவர் இந்திய டெஸ்ட் அணியில் மேட்ச் வின்னராக செயல்பட்டு வருகிறார். முன்னதாக ரிஷப் பண்ட் டெஸ்ட் கிரிக்கெட்டில் ஆஃப் ஸ்பின்னர்களை அதிரடியாக எதிர்கொண்டு ரன்கள் குவிப்பதை வாடிக்கையாக வைத்துள்ளார். குறிப்பாக ஆஸ்திரேலியாவின் நேதன் லயன் 500க்கும் மேற்பட்ட விக்கெட்டுகளை எடுத்து சிறந்த ஸ்பின்னராக செயல்பட்டு வருகிறார்.

அதிரடியான ரிஷப் பண்ட்:

ஆனால் அவரை 2021 சிட்னி, காபா டெஸ்ட் போட்டிகளில் அதிரடியாக எதிர்கொண்ட ரிஷப் பண்ட் பலரையும் ஆச்சரியப்படுத்தினார். அதே போல 2022 இங்கிலாந்து தொடரில் ஜேக் லீச்சை வெளுத்து வாங்கிய அவர் இந்தியாவின் வெற்றியில் பங்காற்றினார். இந்நிலையில் ஆரம்ப காலங்களில் தாமும் ஆஃப் ஸ்பின்னர்களுக்கு எதிராக தடுமாற்றமாக விளையாடி அவுட்டானதாக ரிஷப் பண்ட் கூறியுள்ளார்.

அப்போது முன்னாள் பயிற்சியாளர் ரவி சாஸ்திரி அதிரடியான ஷாட்டுகளை அடித்தால் மட்டுமே ஆஃப் ஸ்பின்னர்களை நன்றாக எதிர்கொள்ள முடியும் என்று ஆலோசனை கொடுத்ததாக ரிஷப் பண்ட் தெரிவித்துள்ளார். இது பற்றி சமீபத்திய பேட்டியில் அவர் பேசியது பின்வருமாறு. “ரவி சாஸ்திரியுடன் எனக்கு சிறப்பான புரிதல் இருந்தது. அவர் எனக்கு நான் விரும்பும் சுதந்திரத்தை கொடுத்தார்”

ரவி சாஸ்திரியின் அட்வைஸ்:

“பொதுவாக குறிப்பிட்ட விஷயத்தை செய்யாதீர்கள் என்று ஒருவர் சொல்வது எனக்கு பிடிக்காது. அதற்கு பதிலாக சிறந்த ஆப்ஷனை கொடுப்பவர்களை விரும்புவேன். நான் எதையும் தவிர்ப்பதை விட சிறந்த விருப்பத்திற்கு மாற விரும்புகிறேன். ஒரு காலத்தில் ஆஃப் ஸ்பின்னர்களுக்கு எதிராக ஷாட்டுகளை அடிக்கும் போது நான் அவுட்டாகி விடுவேன்”

இதையும் படிங்க: ஷமி சொல்லிக் கொடுத்த அட்வைஸ் தான் இந்திய அணியில் வாய்ப்பு கொடுத்துருக்கு.. ஆகாஷ் தீப் பேட்டி

“அப்போது ரவி சாஸ்திரி பாய் என்னிடம் ஆஃப் ஸ்பின்னர்களை அதிரடியாக எதிர்கொள்ள நாம் வழியை கண்டறிய வேண்டும் என்று சொன்னார். அதற்காக நீங்கள் ஆஃப் ஸ்பின்னர்களுக்கு எதிராக ரிவர்ஸ் ஸ்வீப் ஷாட்டுகளை அடிக்க வேண்டும் என்று அவர் என்னிடம் சொன்னார்” எனக் கூறினார். அந்த வகையில் ரவி சாஸ்திரி ஆலோசனைகளை பின்பற்றி டெஸ்ட் கிரிக்கெட்டில் ரிஷப் பண்ட் ஸ்பின்னர்களை வெற்றிகரமாக எதிர்கொண்டு வருவது குறிப்பிடத்தக்கது.