தென் ஆப்பிரிக்காவுக்கு எதிராக இந்திய அணி தங்களது சொந்த மண்ணில் 5 டி20 போட்டிகள் கொண்ட தொடரில் விளையாடி வருகின்றது. அத்தொடரின் முதல் போட்டியில் வென்ற இந்தியாவை 2வது போட்டியில் தோற்கடித்த தென்னாப்பிரிக்கா பதிலடி கொடுத்தது. அதைத் தொடர்ந்து 3வது போட்டி டிசம்பர் 14ஆம் தேதி அழகான தரம்சாலா கிரிக்கெட் மைதானத்தில் இரவு 7:00 மணிக்கு துவங்கியது.
அப்போட்டியில் டாஸ் வென்ற இந்திய அணி முதலில் பந்து வீசுவதாக அறிவித்தது. அதைத்தொடர்ந்து களமிறங்கிய தென்னாப்பிரிக்காவுக்கு முதல் ஓவரிலேயே அர்ஷ்தீப் வேகத்தில் ரீஸா ஹென்றிக்ஸ் டக் அவுட்டானார். மறுபுறம் தடுமாறிய குவிண்டன் டீ காக்’கை 1 (3) ரன்னில் அவுட்டாக்கிய ஹர்ஷித் ராணா அடுத்து வந்த தேவால்ட் ப்ரேவிஸை 2 (7) ரன்களில் அவுட்டாக்கி அசத்தினார்.
அதனால் 7/3 என ஆரம்பத்திலேயே தடுமாறிய தென் ஆப்பிரிக்காவுக்கு கேப்டன் ஐடன் மார்க்ரம் நிதானம் கலந்த அதிரடியை வெளிப்படுத்தினார். ஆனால் எதிர்ப்புறம் வந்த த்ரிஸ்டன் ஸ்டப்ஸ் 9 (13) ரன்களில் தடுமாறி ஹர்திக் பாண்டியா வேகத்தில் பெவிலியன் திரும்பினார். லோயர் ஆர்டரில் கோர்பின் போஸ்க் 4, மார்கோ யான்சென் 2 ரன்களில் அவுட்டாகி பின்னடைவை கொடுத்தார்கள்.
மறுபுறம் தொடர்ந்து நங்கூரமாக விளையாடி வந்த கேப்டன் ஐடன் மார்க்ரம் 6 பவுண்டரி 2 சிக்ஸருடன் 61 (46) ரன்கள் குவித்து போராடி அவுட்டானார். கடைசியில் பெரிரா 20, அன்றிச் நோர்ட்ஜெ 12 ரன்களை எடுத்தும் 20 ஓவரில் அனைத்து விக்கெட்டுகளையும் இழந்த தென்னாப்பிரிக்கா 117 ரன்கள் மட்டுமே எடுத்தது.
இந்தியாவுக்கு அதிகபட்சமாக வருண் சக்கரவர்த்தி, அர்ஷ்தீப் சிங், ஹர்ஷித் ராணா, குல்தீப் யாதவ் தலா 2 விக்கெட்டுகளை சாய்த்தார்கள். அதே போல ஹர்திக் பாண்டியா மற்றும் சிவம் துபே ஆகியோரும் தலா 1 விக்கெட் எடுத்து அசத்தினர். இதையும் சேர்த்து ஹர்திக் பாண்டியா தம்முடைய டி20 கேரியரில் இந்தியாவுக்காக 100 விக்கெட்டுகளை எடுத்துள்ளார்.
இதையும் படிங்க: முதல் இந்திய வீரராகவும் நான்காவது சர்வதேச வீரராகவும் மாபெரும் சாதனையை நிகழ்த்திய – ஹார்டிக் பாண்டியா
அத்துடன் பேட்டிங்கில் அவர் ஏற்கனவே 1370 ரன்கள் குவித்துள்ளார். இதன் வாயிலாக சர்வதேச டி20 கிரிக்கெட்டில் 1000+ ரன்கள் மற்றும் 100+ விக்கெட்டுகள் எடுத்த முதல் இந்திய வீரர் என்ற தனித்துவமான சாதனையை ஹர்திக் பாண்டியா படைத்துள்ளார். அத்துடன் சர்வதேச டி20 கிரிக்கெட்டில் குறைந்தது 1000+ ரன்கள், 100+ விக்கெட்டுகள், 100+ சிக்ஸர்கள் (101) அடித்த முதல் இந்திய வீரர் என்ற தனித்துவமான சாதனையையும் பாண்டியா படைத்துள்ளார்.
