விராட் கோலி, பாபர் அசாம் சாதனைகளை உடைத்த நியூசிலாந்து வீரர் – சிஎஸ்கே ரசிகர்கள் மகிழ்ச்சி

ஆஸ்திரேலியாவில் விறுவிறுப்பாக நடைபெற்று வரும் 2022 ஐசிசி டி20 உலக கோப்பையில் முதல் சுற்று முடிந்து முக்கியமான சூப்பர் 12 சுற்றுகள் துவங்கியுள்ளன. அதில் அக்டோபர் 22ஆம் தேதியன்று நடைபெற்ற முதல் போட்டியில் நடப்பு சாம்பியன் ஆஸ்திரேலியாவை அதன் சொந்த மண்ணில் மண்ணை கவ்வ வைத்த நியூசிலாந்து 89 ரன்கள் வித்தியாசத்தில் அபார வெற்றி பெற்றது. சிட்னியில் நடைபெற்ற அப்போட்டியில் முதலில் பேட்டிங் செய்த நியூசிலாந்து 20 ஓவர்களில் அதிரடியாக செயல்பட்டு உலக கோப்பை வரலாற்றில் முதல் முறையாக 200/3 ரன்களை பதிவு செய்து சாதனை படைத்தது.

அந்த அணிக்கு 59 ரன்கள் ஓப்பனிங் பார்ட்னர்ஷிப் அமைத்து மிரட்டலான தொடக்கம் கொடுத்த ஃபின் ஆலன் 5 பவுண்டரி 3 சிக்சருடன் 42 (16) ரன்கள் விளாசி அவுட்டானார். அடுத்து களமிறங்கிய கேப்டன் கேன் வில்லியம்சன் 23 (23) கிளன் பிலிப்ஸ் 12 (10) என முக்கிய மிடில் ஆர்டர் பேட்ஸ்மேன்கள் சொற்ப ரன்களில் அவுட்டானாலும் மறுபுறம் நங்கூரமாக நின்ற மற்றொரு தொடக்க வீரர் டேவோன் கான்வே ஆஸ்திரேலிய பவுலர்களை அற்புதமாக எதிர்கொண்டு கடைசி வரை அவுட்டாகாமல் 7 பவுண்டரி 2 சிக்சருடன் 92* (58) ரன்கள் விளாசினார். அவருடன் கடைசி நேரத்தில் 2 சிக்சர்களை பறக்க விட்ட ஜிம்மி நீஷம் 26* (13) ரன்களை விளாசி அதிரடியான பினிசிங் கொடுத்தார்.

சூப்பர் சாதனைகள்:
மறுபுறம் சுமாராக பந்து வீசிய ஆஸ்திரேலியா சார்பில் அதிகபட்சமாக ஜோஷ் ஹேசல்வுட் 2 விக்கெட்டுகளை சாய்த்தார். அதன்பின் 201 ரன்களை துரத்திய அந்த அணியை ஆரம்பம் முதலே துல்லியமாக பந்து வீசிய நியூசிலாந்து சீரான இடைவெளியில் விக்கெட்டுகளை எடுத்து 17.1 ஓவரில் வெறும் 111 ரன்களுக்கு சுருட்டியது. ஆஸ்திரேலியாவுக்கு டேவிட் வார்னர் 5, கேப்டன் ஆரோன் பின்ச் 13, மிட்செல் மார்ஷ் 12, மார்க்கஸ் ஸ்டோனிஸ் 7, டிம் டேவிட் 11 என் முக்கிய வீரர்கள் அனைவரும் சொற்ப ரன்களில் அவுட்டான நிலையில் அதிகபட்சமாக கிளன் மேக்ஸ்வெல் 28 (20) ரன்கள் எடுத்தார். நியூசிலாந்து சார்பில் அதிகபட்சமாக டிம் சவுத்தி மற்றும் மிட்சேல் சாட்னர் தலா 3 விக்கெட்டுகளை எடுத்தனர்.

இந்த வெற்றியால் கடந்த வருடம் துபாயில் நடைபெற்ற டி20 உலக கோப்பை பைனலில் தோற்கடித்த ஆஸ்திரேலியாவை இம்முறை அதன் சொந்த மண்ணில் தோற்கடித்து நியூசிலாந்து பதிலடி கொடுத்துள்ளது. மேலும் டி20 கிரிக்கெட்டில் ஆஸ்திரேலியாவை அதன் சொந்த மண்ணில் முதல் முறையாக தோற்கடித்துள்ள அந்த அணி டி20 உலக கோப்பையில் ஆஸ்திரேலியாவுக்கு எதிராக அதிக ரன்கள் வித்தியாசத்தில் பெரிய வெற்றியை பதிவு செய்து சாதனை படைத்துள்ளது. இந்த வெற்றிக்கு சந்தேகமின்றி 92* ரன்கள் குவித்து முக்கிய பங்காற்றிய டேவோன் கான்வே ஆட்டநாயகனாக அறிவிக்கப்பட்டார்.

தென் ஆப்பிரிக்காவில் பிறந்த இவர் நியூசிலாந்துக்கு குடிபெயர்ந்து கடந்த 2020இல் சர்வதேச கிரிக்கெட்டில் அறிமுகமாகி 3 வகையான கிரிக்கெட்டிலும் நியூசிலாந்தின் நம்பிக்கை நட்சத்திர தொடக்க வீரராக செயல்பட்டு வருகிறார். குறிப்பாக டி20 கிரிக்கெட்டில் அதிரடியாக செயல்படும் அவர் இப்போட்டியில் 92* ரன்களைக் குவித்து சர்வதேச டி20 கிரிக்கெட் வரலாற்றில் ஆஸ்திரேலியாவுக்கு எதிராக ஆஸ்திரேலிய மண்ணில் அதிகபட்ச ஸ்கோர் பதிவு செய்த பேட்ஸ்மேன் என்ற விராட் கோலியின் சாதனையை உடைத்து புதிய சாதனை படைத்துள்ளார். அந்த பட்டியல்:
1. டேவோன் கான்வே : 92*, 2022*
2. விராட் கோலி : 90*, 2016
3. விராட் கோலி : 85, 2020

அத்துடன் இப்போட்டியில் குவித்த 92 ரன்களையும் சேர்த்து சர்வதேச டி20 கிரிக்கெட்டில் அதிவேகமாக 1000 ரன்களைக் குவித்த 2வது பேட்ஸ்மேனாக விராட் கோலியை முந்திய அவர் பாகிஸ்தானின் பாபர் அசாம் சாதனையை சமன் செய்துள்ளார். அந்த பட்டியல்:
1. டேவிட் மாலன்/சபாவூன் டேவிசி : தலா 24 இன்னிங்ஸ்
2. பாபர் அசாம்/டேவோன் கான்வே* : தலா 26 இன்னிங்ஸ்
3. விராட் கோலி : 27 இன்னிங்ஸ்

இப்படி சமீப காலங்களில் அதிரடியாக செயல்படுவதாலேயே ஐபிஎல் தொடரில் சென்னை அணிக்கு வாங்கப்பட்ட அவர் இந்த வருடம் முதல் போட்டியில் தடுமாறினார் என்பதற்காக பெஞ்சில் அமர வைக்கப்பட்டு பிளே ஆப் சுற்றில் வாய்ப்பு பறிபோன பின் மீண்டும் வாய்ப்பு பெற்றார். அதில் அட்டகாசமாக செயல்பட்ட அவர் கடைசியில் சென்னை பதிவு செய்த சில வெற்றிகளுக்கு முக்கிய காரணமாக அமைந்தார். அதனால் சென்னையின் வருங்கால நம்பிக்கை நட்சத்திரமாக கருதப்படும் அவரும் இதே போட்டியில் பந்து வீச்சில் 3 விக்கெட்டுகளை எடுத்த மற்றொரு வீரர் மிட்சேல் சாட்னரும் அசத்தியுள்ளது சென்னை ரசிகர்களை மகிழ்ச்சியடைய வைத்துள்ளது.