இந்திய கிரிக்கெட் வீரர் சச்சின் டெண்டுல்கர் மகத்தான பேட்ஸ்மேன்களில் முதன்மையானவராக போற்றப்படுகிறார். ஏனெனில் 16 வயது பிஞ்சுக் கால்களுடன் கடினமான சர்வதேச கிரிக்கெட்டில் அறிமுகமான அவர் வாசிம் அக்ரம் போன்ற மகத்தான பவுலர்களை எதிர்கொண்டார். அந்த வகையில் குறுகிய காலத்திலேயே இந்தியாவின் நம்பிக்கை நட்சத்திரமாக உருவெடுத்த அவர் உலகின் அனைத்து டாப் பவுலர்களையும் மிகச் சிறப்பாக எதிர்கொண்டார்.
குறிப்பாக 90களில் சச்சின் அடித்தால் தான் இந்தியா வெற்றி பெறும் என்ற சூழ்நிலை இருந்ததை ரசிகர்களால் மறக்க முடியாது. அந்தளவுக்கு எதிரணிகளுக்கு சிம்ம சொப்பனமாக திகழ்ந்த அவர் 30000க்கும் மேற்பட்ட ரன்களை அடித்து 100 சதங்கள் விளாசி 1999 கோகோ-கோலா கோப்பை முதல் 2011 உலகக்கோப்பை வரை இந்தியாவின் பல மகத்தான வெற்றிகளில் முக்கிய பங்காற்றியுள்ளார்.
சச்சின் – விராட்:
மறுபுறம் 2008இல் அறிமுகமான விராட் கோலியும் கிட்டத்தட்ட சச்சின் போலவே நவீன கிரிக்கெட்டில் உலகின் டாப் பவுலர்களுக்கு சவாலை கொடுத்து இதுவரை 26,000+ ரன்கள் 80* சதங்கள் அடித்து இந்தியாவின் நிறைய வெற்றிகளில் பங்காற்றி வருகிறார். அதனால் சில சமயங்களில் சச்சினை விட விராட் கோலி தான் சிறந்தவர் என்று ரசிகர்கள் பேசுவது வழக்கமாகும். இந்நிலையில் சச்சினை விட பிரைன் லாரா சிறந்த பேட்ஸ்மேன் என்று முன்னாள் இங்கிலாந்து வீரர் மற்றும் பிரபல பயிற்சியாளர் டேவிட் லாய்ட் கூறியுள்ளார்.
மேலும் டெஸ்ட் கிரிக்கெட்டில் சச்சின் சிறந்தவர் என்றும் வெள்ளைப் பந்து கிரிக்கெட்டில் விராட் கோலி சிறந்தவர் என்றும் தெரிவிக்கும் அவர் இது பற்றி சமீபத்திய பேட்டியில் பேசியது பின்வருமாறு. “சமூக வலைதளங்களில் நான் செய்த ஒரு ஆராய்ச்சியை இங்கே வீசுகிறேன். இங்கே 95% மக்கள் சச்சின் சிறந்தவர் என்று சொல்கின்றனர். சிலர் என்னிடம் சொல்கிறார்கள், விமர்சிக்கிறார்கள், கேள்வி கேட்கின்றனர். இது அபத்தமானது”
“இதற்கு ஒரே ஒரு பதில் தான் இருக்கிறது. சச்சின் தன் ஈகோவை வீட்டிலேயே விட்டு விடுவார். மறுபுறம் விராட் கோலி மிகவும் ஆளுமை மிக்க வீரர் என்று நினைக்கிறேன். டெஸ்ட் கிரிக்கெட்டில் சச்சின் அற்புதமானவர். விராட் கோலி ஆபத்தானவர். ஒருவேளை சச்சின் மற்றும் லாரா ஆகியோரில் சிறந்தவரை தேர்ந்தெடுக்க வேண்டுமெனில் நான் லாராவை தேர்ந்தெடுப்பேன். கண்டுபிடிக்கப்படாத இடங்களில் கூட பந்தை அடிக்கக்கூடிய லாரா எல்லாவற்றையும் இயல்பாக செய்யக்கூடிய மிருகத்தை போன்றவர்”
இதையும் படிங்க: இந்தியாவை தொடர்ந்து டெல்லி அணியிலும் கழற்றி விடப்படும் பிரிதிவி ஷா.. வெளியான மறைமுக அறிவிப்பு
“இருப்பினும் அதை நான் சச்சினிடம் பார்த்ததில்லை. சச்சின் எப்போதும் சமநிலையில் இருப்பார். டெஸ்ட் போட்டியில் விராட் கோலியும் அவரும் அற்புதமான வீரர்கள். உண்மையில் டெஸ்ட் கிரிக்கெட்டில் சச்சின் சிறந்தவர் என்பதில் மாற்றுக் கருத்தில்லை. சச்சின் உன்னதமானவர். அதே சமயம் டி20 மற்றும் ஒருநாள் போட்டிகள் என்று பார்க்கும் போது நீங்கள் விராட் கோலியை சிறந்தவராக சொல்லலாம்” என்று கூறினார்.
