கொரோனா வைரஸ் காரணமாக மார்ச் 29ம் தேதி துவங்க இருந்த ஐபிஎல் தொடர் தற்போது வரை நடக்கவில்லை. மேலும் இருமுறை தள்ளிவைக்கப்பட்ட இந்தத்தொடர் காலவரையின்றி ஒத்தி வைக்கப்பட்டதாக கடைசியாக அறிவிக்கப்பட்டது. ஒருவேளை இந்த ஐபிஎல் தொடர் இந்த வருடம் நடக்கவில்லை என்றால் 47,000 கோடி பிரான்ட் மதிப்புள்ள ஐபிஎல் பிராண்டின் மதிப்பு 5000 கோடிகள் குறைந்து ஐபிஎல் தொடர் நட்டத்தை சந்திக்கும்.
இதன்காரணமாக ஐபிஎல் நிர்வாகம் எப்படியாவது இந்த வருடத்தில் ஐபிஎல் தொடரை நடத்தி விட வேண்டுமென்று மும்முரமாக காத்திருக்கிறது. இதற்கு உலகக் கோப்பை டி20 தொடர் நடக்காமல் இருக்க வேண்டும். அப்போதுதான் அந்த நேரத்தைப் பயன்படுத்தி பிசிசிஐ ஐபிஎல் தொடரை நடத்த முடியும்.
இந்நிலையில் சௌரவ் கங்குலி ஐபிஎல் தொடர் குறித்து மாநில கிரிக்கெட் வாரியங்களுக்கு கடிதம் ஒன்றை எழுதியுள்ளார். அந்த கடிதத்தில் ரசிகர்கள் இல்லாமலும் ஐபிஎல் போட்டியை நடத்த தயாராகுங்கள். அதே நேரத்தில் இந்த வருடம் ஐபிஎல் தொடரை நடத்த நாம் அனைவரும் அனைத்து முயற்சிகளையும் எடுக்க வேண்டும்.
ரசிகர்கள் மட்டுமல்லாது ஐபிஎல் அணிகள் வெளிநாட்டு வீரர்கள், பங்குதாரர்கள், ஸ்பான்சர்கள் என அனைவரும் ஐபிஎல் தொடரை நடத்தி விட வேண்டுமென்று மும்முரமாக காத்திருக்கின்றனர். வெளிநாட்டு வீரர்களும் ஐபிஎல் தொடரில் பங்கேற்க ஆர்வமாக இருக்கின்றனர்.
இதன் காரணமாக ஐபிஎல் தொடரை நடத்துவது குறித்து விரைவில் முடிவு எடுத்து அறிவிக்கிறேன் என்று கூறியுள்ளார். மேலும் அதற்கான ஏற்பாடுகளை தீவிரமாக செய்து வருவதாக கங்குலி தெரிவித்துள்ளார். அவர் கூறியபடி பார்த்தால் இந்த வருடம் இன்னும் சில மாதங்களில் ஐபிஎல் தொடர் நடத்தப்படும் என்பது உறுதியே.
