ஐசிசி 2024 டி20 உலகக் கோப்பையில் இந்திய கிரிக்கெட் அணி தங்களுடைய 2வது சூப்பர் 8 போட்டியில் வங்கதேசத்தை எதிர்கொண்டது. அப்போட்டி ஜூன் 22ஆம் தேதி இந்திய நேரப்படி இரவு 8 மணிக்கு வெஸ்ட் இண்டீஸில் உள்ள ஆன்ட்டிகுவா நகரில் துவங்கியது. அந்தப் போட்டியில் டாஸ் வென்ற வங்கதேசம் முதலில் பந்து வீசுவதாக அறிவித்தது.
அதைத் தொடர்ந்து களமிறங்கிய இந்தியாவுக்கு 3 பவுண்டரி 1 சிக்சரை பறக்க விட்ட கேப்டன் ரோகித் சர்மா 23 (11) ரன்களில் அவுட்டானார். அந்த நிலைமையில் வந்த ரிசப் பண்ட் அதிரடியாக விளையாடிய நிலையில் எதிர்புறம் நங்கூரமாக விளையாடிய விராட் கோலி 3 பவுண்டரி ஒரு சிக்சரை விளாசி 37 (28) ரன்களில் அவுட்டானது ரசிகர்களுக்கு ஏமாற்றமாக அமைந்தது.
அசத்திய இந்தியா:
ஆனால் அடுத்ததாக வந்த நம்பிக்கை நட்சத்திரம் சூரியகுமார் யாதவ் 6 (2) ரன்களில் அவுட்டாகி பின்னடைவை ஏற்படுத்தினர். போதாக்குறைக்கு அடுத்த சில ஓவரில் ரிஷப் பண்ட்டும் 4 பவுண்டரி 2 சிக்சருடன் 36 (24) ரன்களில் அவுட்டானதால் 108/4 என இந்தியா தடுமாறியது. அப்போது ஜோடி சேர்ந்த சிவம் துபே மற்றும் ஹர்திக் பாண்டியா ஆகியோர் நிதானமாக விளையாடினர்.
அதில் ஆரம்பத்தில் தடுமாறிய சிவம் துபே நேரம் செல்ல செல்ல அதிரடியாக விளையாடி 5வது விக்கெட்டுக்கு 53 ரன்கள் பார்ட்னர்ஷிப் அமைத்து 3 சிக்சரை பறக்க விட்டு 34 (24) ரன்களில் அவுட்டானார். அவருடன் மறுபுறம் தம்முடைய பங்கிற்கு அதிரடியாக விளையாடிய ஹர்திக் பாண்டியா 4 பவுண்டரி 3 சிக்சரை விளாசி அரை சதமடித்து 50 (27) ரன்கள் குவித்து நல்ல ஃபினிஷிங் கொடுத்தார்.
அதனால் டி20 உலகக் கோப்பையில் ஆறாவது இடத்தில் களமிறங்கி அரை சதம் அடித்த முதல் இந்திய வீரர் என்ற பெருமையும் அவர் பெற்றார். இறுதியில் 20 ஓவரில் இந்தியா 196/5 ரன்கள் குவித்தது. வங்கதேசம் சார்பில் அதிகபட்சமாக ரிஷத் ஹொசைன் 2, தன்சிம் ஹசன் ஷாகிப் 2 விக்கெட்டுகளை எடுத்தனர்.
இதையும் படிங்க: துரத்தும் துரதிஷ்டம்.. 6 வெற்றிகளை பெற்றும் வெளியேறும் நிலையில் தெ.ஆ? காத்திருக்கும் இங்கிலாந்து ட்விஸ்ட்
முன்னதாக இந்தப் போட்டியில் அடித்த 37 ரன்களையும் சேர்த்து 20 ஓவர் மற்றும் 50 ஓவர் ஆகிய 2 உலகக் கோப்பைகளிலும் விராட் கோலி 3000 ரன்கள் கடந்துள்ளார். இதன் வாயிலாக ஐசிசி உலகக் கோப்பை வரலாற்றில் 3000 ரன்கள் அடித்த முதல் வீரர் என்ற கௌரவமான உலக சாதனையும் அவர் படைத்துள்ளார். அந்த பட்டியல்:
1. விராட் கோலி : 3000*
2. ரோஹித் சர்மா : 2637
3. டேவிட் வார்னர் : 2502
4. சச்சின் டெண்டுல்கர் : 2278
5. குமார் சங்கக்காரா : 2193
