இந்தியா மற்றும் தென் ஆப்பிரிக்க அணிகளுக்கு இடையேயான 3வது டெஸ்ட் போட்டியின் 2-வது நாள் முடிவில் இந்திய அணி முதல் இன்னிங்சில் 497 ரன்கள் குவித்து டிக்ளேர் செய்தது. இந்திய அணி தரப்பில் அதிகபட்சமாக ரோகித் சர்மா 212 ரன்கள் எடுத்து ஆட்டமிழந்தார். ரஹானே 115 ரன்களும் ஜடேஜா 51 ரன்களும் எடுத்தனர்.
போட்டியின் மூன்றாவது நாள் ஆட்டம் தற்போது நடந்து வருகிறது நேற்றைய ஆட்டத்தில் 2 விக்கெட்டுகளை இழந்த தென்னாபிரிக்க அணி இன்று காலையும் அடுத்தடுத்து தனது விக்கெட்டுகளை இழந்தது. இன்று தொடர்ந்து ஆடிய தென்னாப்பிரிக்க அணி 162 ரன்களுக்கு அனைத்து விக்கெட்டுகளையும் இழந்தது. அதிகபட்சமாக ஹம்சா 62 ரன்களை குவித்தார். உமேஷ் யாதவ் 3 விக்கெட்டுகளை வீழ்த்தினார்.
இந்த போட்டியில் 3 விக்கெட்டுகளை வீழ்த்தியதன் மூலம் உமேஷ் யாதவ் ஒரு புதிய சாதனை ஒன்றை புரிந்துள்ளார். அதன்படி இந்திய அணி சார்பாக வேகப்பந்து வீச்சாளர் ஒருவர் தொடர்ந்து 5 இன்னிங்ஸ்களில் மூன்று அல்லது அதற்கு மேற்பட்ட விக்கெட்டுகளை வீழ்த்தியது இதுவே முதல் முறையாகும். உமேஷ் யாதவ் கடைசியாக விளையாடிய 5 இன்னிங்ஸ்களிலும் 3 விக்கெட்டுகள் மற்றும் அதற்குமேல் வீழ்த்தியது குறிப்பிடத்தக்கது.
இதற்கு முன்னர் ஜவகல் ஸ்ரீநாத் மற்றும் கபில்தேவ் ஆகியோர் 4 இன்னிங்ஸ்களில் தொடர்ச்சியாக மூன்று அல்லது அதற்கு மேற்பட்ட விக்கெட்டுகளை வீழ்த்தி இருந்தது குறிப்பிடத்தக்கது
