ஐசிசி 2024 டி20 உலகக் கோப்பை ஜூன் 2ஆம் தேதி அமெரிக்காவில் கோலாகலமாக துவங்குகிறது. சர்வதேச டி20 கிரிக்கெட்டின் புதிய சாம்பியனை நிர்ணயம் செய்யும் இந்த தொடரில் 2007க்குப்பின் கோப்பையை வெல்லும் முனைப்புடன் ரோகித் சர்மா தலைமையிலான இந்திய கிரிக்கெட் அணி விளையாடுகிறது. வழக்கம் போல இம்முறையும் இந்தியாவின் வெற்றிக்கு பேட்டிங்கில் நம்பிக்கை நட்சத்திரம் விராட் கோலி அதிக ரன்கள் அடிப்பது அவசியமாகிறது.
சொல்லப்போனால் 2023 உலகக் கோப்பையில் 765 ரன்கள் விளாசி தொடர்நாயகன் விருது வென்று உலக சாதனை படைத்த அவர் 2024 ஐபிஎல் தொடரில் 741 ரன்கள் அடித்து ஆரஞ்சு தொப்பையை வென்றார். அந்த வகையில் நல்ல ஃபார்மில் இருக்கும் அவர் ஏற்கனவே 2014, 2016 உலகக் கோப்பைகளில் தொடர்நாயகன் விருது வென்றுள்ளார். மேலும் 2022 டி20 உலகக் கோப்பையில் அதிக ரன்கள் அடித்த வீரராக சாதனை படைத்தார்.
கங்குலியின் விருப்பம்:
எனவே இம்முறையும் எதிரணிகளுக்கு சிம்ம சொப்பனமாக திகழ்ந்து இந்தியாவின் வெற்றி நாயகனாக விராட் கோலி செயல்படுவார் என்று ரசிகர்கள் உறுதியாக நம்புகின்றனர். இந்நிலையில் விராட் கோலி மகத்தான வீரராக இருந்தாலும் இம்முறை இந்தியா வெற்றி பெறுவதற்கு ஓப்பனிங்கில் களமிறங்க வேண்டும் என்று முன்னாள் கேப்டன் சௌரவ் கங்குலி கேட்டுக் கொண்டுள்ளார்.
கடந்த 2 மாதமாக இந்த கருத்தை சொல்லி வரும் அவர் மீண்டும் இது பற்றி சமீபத்திய பேட்டியில் பேசியது பின்வருமாறு. “நான் ரோகித் மற்றும் விராட் கோலி ஆகியோரை துவக்க வீரர்களாக களமிறக்குவேன். ஐபிஎல் தொடரின் 2வது பகுதியில் ஆர்சிபி அணிக்காக விளையாடிய வழியில் விராட் கோலி இங்கேயும் விளையாட விரும்புகிறேன். அவர் சுதந்திரமாக பேட்டிங் செய்ய வேண்டும்”
“அவர் மகத்தான வீரர் என்று சொல்வது தேவையற்றது. ஆனால் இந்தியா சிறப்பாக செயல்படுவதற்கு விராட் கோலி ஐபிஎல் தொடரைப் போல ஓப்பனிங்கில் சுதந்திரமாக விளையாட வேண்டும். எனவே ரோஹித் மற்றும் விராட் ஆகியோர் டாப் ஆர்டரில் விளையாட வேண்டும் என்பதே என்னுடைய விருப்பமாகும். நம்முடைய அணியில் நிறைய தரமான வீரர்கள் இருக்கின்றனர்”
இதையும் படிங்க: 55 ரன்ஸ்.. ஸ்காட்லாந்தை அசால்ட்டாக வீழ்த்தி.. லாரா கருத்தை நிஜமாக்கி அப்செட் செய்ய தயாரான ஆப்கானிஸ்தான்
“அவர்கள் ஐபிஎல் தொடரால் டி20 கிரிக்கெட்டில் சிறப்பாக விளையாடி இங்கே வருகின்றனர். அது நியூயார்க் நகரில் அவர்களுக்கு உதவும். அங்குள்ள பெரிய மைதானங்கள் நம்முடைய ஸ்பின்னர்களுக்கு உதவும். எனவே உலகக் கோப்பைகளில் நீங்கள் இந்தியாவை குறைத்து மதிப்பிட முடியாது. ஏனெனில் நம்முடைய அணியில் நிறைய தரம் இருக்கிறது. அதுவே அதற்கான எளிதான காரணமாகும்” என்று கூறினார்.
